#329క్షమాపణ వేడుట
Author: సిరిపురపు కృపానందముComposer/Ragam: ఖమాసుCategory: దేశీయ ప్రేషితోద్యమ రీతి
ప
పాపిని కృప చూపుమయ్యా – దాపు జేరితిని యేసయ్యా – పాప భారము క్రింద శ్రమపడి – కృంగియున్నాను యేసయ్యా ॥పాపిని॥
1.
వేష భాషలతోడ నిండి – మోసపోతిని యేసయ్యా – దోసి లొగ్గి నిన్ను జేరితి – దాసునిగ బ్రోవు యేసయ్యా ॥పాపిని॥
2.
నీతి లేని నాదు జీవిత – మేల నశించనియ్యవు యేసయ్యా – నీతి గరపి బ్రోవుమయ్యా – నీతి నిధుడా యేసయ్యా ॥పాపిని॥
3.
నీదు సిలువలోని ప్రేమ – నెంచదరమౌనా? యేసయ్యా – నాదు కలుషమంత బాపి – కనికరింపుమా యేసయ్యా ॥పాపిని॥
4.
నీదు రక్తధారలే ఇల – పాపి కాశ్రయము యేసయ్యా – నీతిమంతుల జేయుమయ్యా – నీతిసూర్యుండా యేసయ్యా ॥పాపిని॥
5.
దాపుగోరినవారలకు నీ – ప్రాపునిచ్చెదవు యేసయ్యా – పాపశాపము బాపి నిత్య – జీవమిడువయ్యా యేసయ్యా ॥పాపిని॥
6.
శాంతి గోరువారలెల్ల నీ – చెంత కరిగినచో యేసయ్యా – చింతలెల్ల దీర్చగలవు – శాంతి నొసగెదవు యేసయ్యా ॥పాపిని॥
7.
పరమరక్షక నీదు ప్రేమ – నెరుగు తరమౌనా యేసయ్యా – పరులమైన మమ్ము బ్రోవ – వేచియున్నావా యేసయ్యా ॥పాపిని॥
8.
నాదు హృదయము నీదె సుమ్మా – నీవె గైకొనుమా యేసయ్యా – శుద్ధ హృదయము చేసి నన్ను నీ – సుతునిగ జేయు యేసయ్యా ॥పాపిని॥