#154ధన్యతలు

కవులు లాభ మరసి చేయు కపట మంత్రముల్ విధులు దేవుల బోవ దరిమి యేసు తత్వము గొనువారి కన్న ||నెవరూ||

దీన మానసుల కట్టి యూప దేశ మిచ్చెను దివ్యమైన మోక్ష రాజ్యము వారిదౌనటంచు ప్రభువు తెల్పె ||నెవరూ||

మృజినములకై దుఃఖించెడి సుజను లెవ్వరో వారు నిజముగ నోదార్పు బొంది నిత్య సంతోషితులని తెల్పె ||నెవరూ||

శాంతి నీతి కరుణల యందా సక్తిగలవారు భూస్వా తంత్రులై పరితృప్తినొంది దయ పడసెదరని ప్రభువు తెల్పె ||నెవరూ||

పరిశుద్ధ హృదయులు పరతత్పరుని జూతురు సర్వ నరుల సమాధానపరచు నరులే పరమ జనకుని సుతులు ||నెవరూ||

నీతి కొరకు హింస నొందెడి నిశ్చలాత్ములు వారు ఖ్యాతిగ బరలోక రాజ్య ఘన సౌఖ్యములు ఎల్లను బడయుదురు ||నెవరూ||

మనసార దేవుని మానక ప్రేమింపు మనచు నేర్పెన్ ఇంక దనబోలె నొరులను దాను ప్రేమింపగ దనర దెల్పెన్ ||నెవరూ||

తన శిష్యులకు నైక్యమును ప్రేమించుట కాజ్ఞ లొనర నిచ్చె నెంతో ఘన సత్ప్రభువు కాళ్ళు గడిగి భక్తులచోట వినతుడయ్యెన్ ||నెవరూ||